Search

"Latgalīšu puosokys i puorsokys" niu var nūsaklauseit ari škārsteiklā


Bīdreiba “Latgolys Producentu Grupa” kotram grybātuojam niu pīduovoj nūsaklauseit 2010. godā diska formatā izdūtū audio īrokstu “Latgalīšu puosokys i puorsokys” – dažaidys latgalīšu puorsokys, kuruos īrunuojuši Latgolys kulturā zynomi ļauds.

2010. godā izdūtajā diskā īraksteituos puorsokys vairuoku godu garumā, sasateikūt ar teiciejim vysaiduos Latgolys vītuos, savuokuse kulturys darbineica i tradicionaluos kulturys tradiceju turātuoja Iveta Dukaļska. Kūpā diskā “Latgalīšu puosokys i puorsokys” īraksteita 31 puorsoka i tuos īrunuojuši taidi Latgolys kulturā zynomi ļauds kai Aigars Runčis, Artūrs Uškāns, Gunārs Igaunis, Guntra Kuzmina-Jukna, Alvis Bernāns, Juris Vucāns, Ilmārs Dreļs, Andris Slišāns, Ilga Šuplinska, Valentīns Lukaševičs, Oskars Orlovs, Līga Rundāne, Kristaps Rasims, Andrejs Rudzinskis i cyti. Taipat īrokstā dzierdams ari teiciejis Annys Glinskys bolss.

Disku “Latgalīšu puosokys i puorsokys” izdeve bīdreiba “Latgolys Producentu Grupa”, i īroksta mierkis beja padareit daīmamuoku itū latgalīšu mutvuordu folklorys daļu. Diska izdūšonu atbaļsteja Vaļsts kulturkapitala fonds. Īroksts sovulaik tyka duovynuots Latgolys nūvodu bibliotekom, školom, bārnuduorzim, dažaidom navaļstiskom i cytom organizacejom, bet niu puosokys kotrys grybātuojs breivi var nūsaklauseit tepat “Latgolys Producentu Grupys” sātyslopā voi Youtube kanalā https://ej.uz/puorsokys. Pošu reizi var nūsaklauseit pyrmū puorsoku daļu, bet da nedelis gola, kotru vokoru pasaruodūt pa kaidai kluotyn, klauseituojus īprīcynuos ari puorejuos.

“Peiksti voi napeiksti, ak, muote sacē, ka juosaklausa, ta juosaklausa irā!” tai, drupeit puorfrazejūt vīnu nu puorsoku, ari desmit godu piec diska izdūšonys var saceit par puorsoku klauseišonūs. Bīdreiba cer, ka puorsokys prīcynuos kai itymā, drupeit čudnajā laikā, tai ari piečuok – eipaši ar latgalīšu volūdu īpazeistynojūt ari mozuokūs klauseituojus.







Bīdreiba "Latgolys Producentu Grupa"