Bīdreiba "Latgolys Producentu Grupa"

Search

Gotova kina "Latgalīši Sibirī"



Golā ir dorbs pi dokumentaluos filmys “Latgalīši Sibirī”, kas stuosta par latvīšim (latgalīšim) tuolajūs Sibira plašumūs, kuru seņči iz tīni nu Latgolys devēs peļņā, vāluok daudzi, tī dabuojuši zemi, palyka iz dzeivi. Jūs piecnuocieji vēļ ir saglobuojuši latgaliskuos tradicejis i volūdu.


Vosorys vydā fiļmiešonys grupa devēs divu nedeļu ilgā ekspedicejā iz Krīveju, Sibiri, kab sasatyktu ar latgalīšim, kas tī dzeivoj jau trešajā paaudzē, zyna vēļ latgalīšu volūdu i pīkūp latgaliskuos tradicejis. Tyka satykti ari latgalīši, kuru saimis lūcekļus nu Latvejis deportēja padūmu vara. Satyktūs latgalīšu saimu stuosti byus radzami jaunajā dokumentajā filmā “Latgalīši Sibirī”.


Filma atkluos interesantus faktus par latgalīšu izceļuošonu i latgaliskū kulturu Sibirī, pīdzeivuotajom represejom. Filmā varēs vaira izzynuot, pīmāram, par Moskovys izdevnīceibā “Prometejs” latgaliski izdūtū Daniela Defo romanu “Robinsons Kruzo”, pabyut dzeraunē Mihailovka, kur izsyutejumā dzeivuoja i nūmira latgalīšu politiks, rakstnīks i sabīdryskais darbinīks Fraņcs Kemps. Sibirīšu i kinys veiduotuoja Arņa Slobožanina stuostus papyldynuos ekspertu komentari.


Filmys “Latgalīši Sibirī” pyrmizruode nūtiks 25. septembrī 18.00 Daugovpilī, “Šmakovkas muzejā”, 27. septembrī filmu 18.00 i 20.00 ruodeis Rēzeknis Tehnologeju akademejā. Vāluok paradzāti cyti filmys seansi, goda nūgalē jū planavuots ruodeit ari Latvejis Televizejā.


“Latgalīši Sibirī” taisejuši: režija i moderators: Arnis Slobožanins, ideja: Valentīns Lukaševičs, video, skaņa, montaža: Ivars Utināns, tehniskais direktors: Juris Linužs.


Pārn pyrmizruodi pīdzeivuoja i skateituojim tyka atruodeit kina "Latgalīši Pīterpilī", kura sajieme ari Latgalīšu kulturys goda bolvu "Boņuks 2018".


Kinys "Latgalīši Sibirī" topšonu atbolsta Vaļsts kulturkapitala fonda Latgolys kulturys programa, kurū eistynoj Latgolys regiona planavuošonys agentura i finansej A/S "Latvijas Valsts meži".






Viests sagataveita, izmontojūt latgalīšu kulturys ziņu portala lakuga.lv publikaceju: https://www.lakuga.lv/2019/09/18/uzjimta-dokumentaluo-filma-par-latgalisim-sibiri/