Bīdreiba "Latgolys Producentu Grupa"

Show More

Dabasu Durovys 

PĀDYS RUNOJ

Sovā 10. jubileja godā catūrtū studejis albumu izdavuse grupa “Dabasu Durovys”. Albums viestej par cylvākim, sajiutom i klusuma volūdu, kas reizem pasoka vaira par vuordim. Juosoka, ka četri albumi vīnai grupai modernajā latgalīšu muzykā ir jau viesturiskys sasnāgums!


Jaunais albums ir stuosts par ceļu i ari pādim, kas vyslobuok zyna par tū, kas ir pīdzeivuots. Itei tema vīnoj vysys albumā īkļautuos dzīsmis, kurūs nūslāgumā ir na beigys, nu suokys – dzīsme “Suokums”. “Pādys Runoj” ir ari par pošys grupys 10 godu ceļu, kas ļuovs atrast vītu Latvejis i eipaši Latgolys muzykā i ari atstuot sovus pādus tamā.
Zeimeigi grupys jubilejai, albumā īkļautys 10 dzīsmis. Kai soka “Dabasu Durovys” liders Arņs Slobožanins, dzīsmis itūreiz radeitys drupeit cytaiž kai ogruok – lānuok, nu kruosainuok, partū ka tūs radeišonā īsasaistejuši vysi grupys bīdri. Puse nu albuma dzīsmem skaņ ari latgaliski i taišni itei formula – dzīsmis gan latgaliski, gon latvīšu literarajā volūdā ir taida, kas ar “Dabasu Durovom” struodoj daudzu godu garumā, dabojūt sovu atpazeistameibys lauku vysā Latvejā. Jau ogruok klauseituoju viertiejumam nūdūtys taidys albumā nūsaklausomuos dzīsmis kai “Šūpuļdziesma”, “Pādys”, “Suokums” i ari dzīsme “Augstumā”, kas radeita ar Raiņa vuordim. Jaunuo albuma dzīsmem tekstus radejuši Arņs Slobožanins i latgalīšu dzejnīks Valentins Lukaševičs. Dzīšmu muzykys autori ir grupys dalinīki Arņs Slobožanins, Egils Kulmanis, Romans Sladzis, Aleksandrs Tamans, Valdis Rundzāns.


Albums īraksteits puorsvorā “Custom Studio” Daugovpilī. Izmontuotys ari grupys dalinīku sātys studejis i īrokstu studeja “Bozova” Kuorsovys nūvodā. Īrokstus producējuši poši grupys dalinīki. Albuma izdeviejs – bīdreiba “Latgolys Producentu Grupa”.