ŠKILBANU SĪVAS

2016. goda decembra suokumā eipašā gūdā calta Zīmeļlatgolys tradicionaluo dzīduošona – izguojuse 144 puslopu bīza gruomateņa par Škilbanu etnografiskū ansambli i tuo dzīduotuojom. Gruomatenis dalykumā ari dzīšmu albums ar 26 īrokstim.

Gruomateņa-albums ir veļtejums Škilbanu etnografiskuo ansambļa 35 godu jubilejam, tymā stuostūs i biļdēs apsaverama kai ansambļa viesture, tai 20 Škilbanu sīvu dzeivisstuostūs var īpasazeit ar ansambļa dzīduotuojom. Gruomateņai kluot dalyktajā albumā 26 īrokstūs dzierdams kai myusu dīnu ansambļa skaniejums, tai atsevišku sīvu solo dzīduojumi i ari senejī arhivu īroksti. Gruomateņā atrūnomi ari dzīšmu vuordi i vysu dzīsmu notu transkripcejis. Izdavums vaira dūmuots tradicionaluos muzykys interesentim, taipat ari tim, kas gryb vaira dazynuot kū ta par Zīmeļlatgolys stuostim i Latgolu kai taidu.

“Škilbanu sīvas” izdūd bīdreiba “Latgolys Producentu Grupa”, izdūšonu atbaļstejs Vaļsts kulturkapitala fonds. Vaira par izdavumu i Škilbanu etnografiskū ansambli var dazynuot http://skilbanusivas.lv.