Laura Bicāne. Albums TRĪSPUKSTI

Sovu ūtrū albumu 2015. goda aprelī izdavuse latgalīšu dzīsmineica Laura Bicāne, kurei ar sovu skaneigū bolsa tembru, meitineigumu i jai rakstureigajom melodejom ir sovpateigs Latgolys muzykys duorgums.

Jaunais albums „Trīspuksti” eipašs ar tū, ka tymā vydā ir dzīsmis ar Daugovpiļs pusis  dzejneicys Egitys Terēzis Jonānis haikom. Poša Laura par itū sadarbeibu soka: „Egita ir pīrakstejuse treis-aileitis, kurymuos paglobuojuse melodeju. Maņ ir īsadevs atkluot tymuos īveituos melodejis pavedīnu. Egitys dzejūli ir cīši sirsneigi i patīsi. Taidys ir ari ituos dzīsmis.” 

Albumā nūklausomys 13 dzīsmis ar Egitys ailem, bet kai 14. aba „bonus” dzīsme atrūnoma kūpā ar tenoru Jāni Kurševu īdzīduotuo „Kuozu dzīsma”, kas ir Laurys veļtejums muosai kuozu dīnā. Itei „bonus” dzīsme ir ari vīneiguo, kas albumā itūreiz izskaņ latgaliski. Ka sovā pyrmajā albumā Laura vaira apdzīduoja dobys i mīlesteibys temu, niu vyss albums ir kai dasadūršona Dīvam, kas reizē ar dzīsmineicys izdzīduotajom emocejom kotram nu treispukstu dadūd lyugšonys sajiutu.
Albuma īrokstā pīsadalejuse spieceiga i Latvejā labi zynoma muziķu komanda: Artis Orubs, Norberts Skraucis, Kārlis Indrišonoks, Deniss Paškevičs, Ingus Feldmanis, Pāvels Veličko, īroksta procesu vadejs, albumu apstruoduojs i ari īrokstā pīsadalejs muzikis Valdis Indrišonoks. Albuma izdeviejs – bīdreiba „Latgolys Producentu Grupa”.