LATGOLYS RADEJIS DZĪŠMU IZLASE #1

2007. goda decembra suokums Latvejis muzykys dzievē atguoja ar kaidu da itam nabejušu nūtykumu. “Latgolys Producentu Grupys” paspuornē izdūta pyrmuo latgalīšu muzykys izlase, kurā puorstuovātys 20 vairuok ci mozuok pazeistomys dažaidu latgalīšu muokslenīku i stilu dzīsmis.

Vysys izlasē īkļautuos dzīsmis ir popularys i klauseituoju meiļuotys Latgolys Radejis viļņūs i vairums īgyvušs „Latgolys Radejis TOP 20” pyrmū poziceju, tī kluotu leluokuo dale nu izlasē īkļautom kompozicejom pyrma ituo nav tikušs publicātys muzyķu albumūs i izlasēs.

Izlasē īkļautuos kompozicejis:

1.Trojs „Laika prognoze reitdīnai” 2.Jurs Ostrovskis “Daugaveņa” 3.Patrioti.LG „Latgaļu regejs” 4.Dziga “Dzīd voi raudi” 5.Laimas Muzykanti “Tuoli dzeivoj“ 6.Latgales Dāmu Pops “Topmodele” 7.Cielaviņa “Oi, Dīveni“ 8.Borowa Mc “Maņ navajag“ 9.Green Novice „Zyli malny padebeši” 10.Weron Martin „Dabasi raud” 11.Rudiņs Steigys „Laimeņa” 12.Dabasu Durovys „Bezpruotā” 13.Crust “Tev ļauts“ 14.L.P.I.V. „Opeļs” 15.Bez PVN “Digitaluo gūteņa“ 16.Postmarka “Eima, eima, muoseņas“ 17.Inga i Normunds “Vuolūdzeite“ 18.Baltie Lāči „Munys Slēpis” 19.Drycānu Dominante “Komer mes Latgolā” bonus: Bez PVN “Mozuo”.
Dzīsmis sakuortuoja pasauļa muzykys eksperts Artūrs Uškāns i draugi.
Izlasis izīšonu atbalstejuši: „Latgolys Radeja”, LRTA „Ezerzeme”, žurnali „Sieviete”, „A-Zet” i sabīdriskais darbinīks Dainis Mjartāns.
.
Dzejnīka Ontona Slišāna saraksteita aile par gūdu Latgolys Radejis izlasis izīšonai. Upeite, 29.12.2007.

As…
Nūduca pārkyuņs,
Nūzyba zibiņs –
Vysa Latgola sasaausejuos …
– As ar čyuļīm nadoncoju!

Paspeida smaidi,
Kai sylta saule –
Pa vysu Latgolu nūzvanieja…
– As ar čyuļīm nadoncoju!

Nūreiba Mieness
Dabasūš aužki,
Zvaigzneitis rozbyra pa vysureini…
– As ar čyuļīm nadoncoju!

Mozgi nu mielēm
Nūst rozasieja –
Vysur skaneja, gavilieja…
-As ar čyuļīm nadoncoju!

Lai tai i tuoļuok,
Lai tai iz prīšku –
Latgaļu volūdā dyžojamīs…
– As ar čyuļīm nadoncoju!

29.12.2007.
Ontons Slišāns